Кентау қаласында ірі спорт кешенінің құрылысы жүргізілуде. 2025 жылдың тамыз айында басталған құрылыс жұмыстары биыл толық аяқталып, пайдалануға беріледі деп жоспарланған. Қазіргі таңда нысанда іргетас құю, бағаналардың темір қаңқасын орнату, бетон құю, кірпіш қалау және 2-қабаттың монолитті құрылымдарын құю жұмыстары жүргізілуде. Бүгінгі таңда құрылыс жұмыстарына 70 құрылысшы мен 2 техника жұмылдырылған.
Жоспар бойынша екі қабатты спорт кешенінде әмбебап спорт залы, күрес және бокс залдары, шығыс жекпе-жектері мен көркем гимнастикаға арналған залдар, сондай-ақ қосымша қажетті бөлмелер қарастырылған. Кешен толық пайдалануға берілгеннен кейін онда 1000-ға жуық спортшы жаттыға алады.
Жаңа спорт кешенінің ашылуы қала тұрғындары үшін бұқаралық спортпен шұғылдануға кең мүмкіндік беріп, жасөспірімдердің бос уақытын тиімді ұйымдастыруға жағдай жасайды. Сонымен қатар, заманауи талаптарға сай жабдықталған нысан түрлі деңгейдегі жарыстар мен спорттық іс-шараларды өткізуге мүмкіндік береді.
Мұндай инфрақұрылымның дамуы өңірде спорт мәдениетін қалыптастырып, талантты спортшыларды тәрбиелеуге оң әсерін тигізеді. Спорт кешені пайдалануға берілгеннен кейін қаладағы спорт секцияларының жұмысы жанданып, салауатты өмір салтын ұстанатын тұрғындар санының артуына ықпал етеді.
