Бүгін, 26 қарашада, ҚР президенті Нұрсұлтан Назарбаев Маңғыстау облысының әкімі Ералы Тоғжановты қабылдады, деп хабарлайды Ақорданың баспасөз қызметіне сілтеме жасап Ardak.kz
Кездесу барысында облыс басшысы елбасыға өңірдің экономикалық дамуының негізгі көрсеткіштері, сондай-ақ облыстағы мемлекеттік және салалық бағдарламалардың іске асырылу барысы туралы есеп берді.
Сонымен қатар Ералы Тоғжанов мемлекет басшысына өнімділікті арттыру және өңдеу өнеркәсібін дамыту мақсатымен қабылданып жатқан шаралар жөнінде мәлімдеді.
Сондай-ақ, облыс әкімі тұрғын үйлер мен студенттік жатақханалар салу, шағын және орта бизнеске қолдау көрсету, жаңа жұмыс орындарын ашу жөніндегі бағдарламаларды іске асыру нәтижелері, сондай-ақ өңірдің туристік әлеуетін дамыту барысы мен коммуналдық қызметтерге қатысты тарифтерді реттеу саласында қабылданып жатқан шаралар туралы баяндады.
Кездесу қорытындысы бойынша президент Маңғыстау облысының әкіміне бірқатар нақты тапсырма берді.
