Бүгін Түркістан облысының әкімі Өмірзақ Шөкеев Қазығұрт ауданына жұмыс сапарымен барды, деп хабарлайды ҚазАқпарат.
Өңір әкімдігінен мәлем еткендей, облыс басшысы алдымен «Амангелді» ЖШС-ның жұмысымен танысты. Қожалықтың жер көлемі — 2322 гектар. Өндіретін өнім түрлері — I, II және III репродукциялы бидай тұқымы мен жеміс-жидек өнімдері. Онда 250 адам тұрақты жұмыспен қамтылған. Тамшылатып суару әдісімен 405 гектар алқапқа жеміс-жидек егіп отыр. Атап айтқанда, 150 гектарға — алма, 88 га жерге — шабдалы, 31 га — шие, 94 га — алхоры, 25 га — өрік, 17 га — алмұрт, 120 га — тайфый сортындағы жүзім.
Қожалық жұмысымен танысқан Ө.Шөкеев өнімдерді экспорттауды қолға алу қажеттігін айтты.
Аудандағы сапар «Ауыл — ел бесігі» жобасы шеңберінде Қазығұрт ауданында іске асырылатын жобаларға арналған жиынмен жалғасты. Онда аудан әкімі Төлеген Телғараев бағдарлама аясында атқарылар жұмыстармен таныстырды.
«Қазығұрт ауданына «Ауыл — ел бесігі» жобасы шеңберінде 2019 жылы 608 млн 757 мың теңге бағыттау жоспарлануда. Жолдарды орташа жөндеуге 343 млн 192 мың теңге, ал білім саласы бойынша мектептерді ағымдағы жөндеуге 37 млн 915 мың теңге қарастырылды. Сондай-ақ, жоба аясында орталық футбол алаңы, балабақшалар, мәдениет үйі, орталық кітапхана ағымдағы жөндеуден өтеді», — деді аудан әкімі.
Облыс әкімі аудан басшылығына «Ауыл — ел бесігі» бағдарламасын қолдап, ауылды, аймақты көркейту қажеттігін тапсырды.
«Жоба жүйелі түрде іске асуы қажет. Алдымен аудан орталығы, округ орталығы, кейін жыл сайын 5 ауылды көркейтіп, абаттандыру жұмыстары жүргізілуі керек. Ауылдарда нысандар көбірек салынып, көшелер жөнделіп, саябақтар саны жыл сайын артуы тиіс», — деді Өмірзақ Шөкеев.
