Білім мекемелерін зейнеткерлер күзетеді: Сенатта оқу орындарының қауіпсіздігі талқыланды

613

Сенатор Ішкі істер, сондай-ақ Білім және ғылым министрлеріне депутаттық сауал жолдады.

Білім беру мекемелеріндегі күзет қызметіне кәсіби кадрларды тартып, қазіргі заманғы цифрлық технологияларды қолдану керек. Сенат депутаты Ақылбек Күрішбаев Жоғарғы палатаның жалпы отырысында осы мәселені көтерді, деп хабарлайды Ardak.kz ақпараттық порталы.

Сенатор Ішкі істер, сондай-ақ Білім және ғылым министрлеріне жолдаған депутаттық сауалында жақында Ресейдің Қазан және Пермь қалаларында оқушылар қайтыс болған қайғылы жағдай оқу орындарын қорғауға көп көңіл бөлу керектігін көрсетті деп мәлімдеді.

Сенатордың пікірінше, Қазақстанда бұл мәселеде өте маңызды кемшіліктер бар. Мектептер мен университеттерді көбінесе күзет агенттіктері төлейтін аз жалақыға жұмыс істейтін зейнеткерлер күзетеді. Ал кейбір жағдайларда мұнымен лицензиялары да, дағдылары да, тәртіп бұзушыларды ұстау үшін арнайы құралдары да жоқ штаттық вахтерлер айналысады.

«Еліміздің оқу орындарындағы қауіпсіздік жүйесіндегі проблемаларға бұдан әрі көз жұма қарауға болмайды. Себебі таразының басында – біздің балаларымыздың өмірі мен денсаулығы тұр. Уәкілетті мемлекеттік органдарға осы саладағы істердің нақты жағдайына сыни талдау жүргізуді және күзет қызметіне қойылатын талаптарды күшейтуді, жұмысқа кәсіби кадрларды тарту және қазіргі заманғы цифрлық технологияларды, оның ішінде бейнемониторинг пен бейнеталдауды пайдалану арқылы еліміздің білім беру объектілерінде қауіпсіздік жүйесін түбегейлі қайта қарауды ұсынамын», — деді сенатор.

Ақылбек Күрішбаев Сенат депутаттары бұл жұмысқа заңнамалық деңгейде белсене қатысуға дайын екенін атап өтті.