Түркістан облысындағы ауыл шаруашылығының өнім көлемі биыл жыл басынан 116,4 млрд теңгені құрады. Осы ретте ауыл шаруашылығында 3 кластерлік бағытты дамыту қолға алынған. Оның ішінде мақта-тоқыма кластері аясында жалпы құны 197 млрд теңгені құрайтын 5 жоба іске асырылмақ. Онда 7 мың жұмыс орны ашылады деп көзделуде. Жоба шеңберінде мақта өңдеудің толық циклін қамтитын, құны 147 млрд теңгені құрайтын 10 ірі зауыттың құрылысы басталды. Оның ішінде, 4 мақта өңдеу зауыты, 4 тоқыма фабрика мен 2 тамшылатып суғару өндірісі бар.
Бүгінде тамшылатын суғарудың ПВХ құбырын шығаратын бір зауыттың құрылысы аяқталып, іске қосылған. Сондай-ақ, биыл Отырар ауданында қос мақта өңдеу зауыты мен тамшылатып суғару өндірісі іске асады. Одан бөлек, Түркістан қаласында 2 тоқыма фабрикасы ашылмақ. Жобалар толық іске асқан жағдайда су 3-4 есе үнемделеді. Сонымен қатар, мақта өнімділігі екі есе артып, дайын тоқыма өнімдерін шығаруға мүмкіндік береді. Бұдан бөлек, биыл «Түркістан» әлеуметтік-кәсіпкерлік корпорациясымен 3 мақта өңдеу зауыттарын салу жобасы қолға алынды.
Түркістан облысының Өңірлік коммуникациялар қызметі
