Нұрсұлтан Назарбаев: Тұрақтылық болмаса барлық жетістіктен айырыламыз

614
Елбасы Нұрсұлтан Назарбаев Қазақстан халқы Ассамблеясы Төрағасының орынбасары, Ассамблея хатшылығының меңгерушісі Жансейіт Түймебаевты қабылдады. Бұл туралы ҚазАқпарат Қазақстан Республикасының Тұңғыш Президенті — Елбасының Баспасөз қызметіне сілтеме жасап хабарлайды.
Кездесуде Қазақстанның Тұңғыш Президентіне Ассамблеяның қазіргі қызметі және ХХVII сессияда айтылған міндеттерді жүзеге асыру үшін қолға алынып жатқан шаралар туралы мәлімделді.
Нұрсұлтан Назарбаев Ассамблеяның тұрақтылықты сақтау және қоғамның бірлігін нығайту үшін атқарылып жатқан жұмыстардың маңыздылығын атап өтті.
«Қазақстан халқы Ассамблеясы қоғамды біріктіретін құрылым. Әр өңірде кіші асамблеялар жұмыс істеуде, достық үйлері ашылды. Қазір еліміз үшін тұрақтылықтың маңызы зор. Тұрақтылық болмаса барлық жетістіктерімізден айырыламыз. Сондықтан, Қазақстан халқы Ассамблеясының басты міндеті — халықтың бірлігін нығайту үшін қоғамды жұмылдыру», — деді Елбасы.
Ж.Түймебаев этномәдени бірлестіктердің Қазақстан Республикасының Тұңғыш Президентіне бейбітшілік пен келісімді сақтағаны, сондай-ақ ел экономикасын дамыту ісіндегі жетістіктері үшін зор ризашылық білдіретінін атап өтті.