Ел аумағында төтенше жағдай режимінің енгізілуіне орай ҚР Президентінің тапсырмаларының орындалуына байланысты Шымкент қаласында арнайы штаб құрылған. Бұл туралы қала әкімінің орынбасары Ербол Садыр ақпараттық-коммуникация орталығында өткен баспасөз брифингінде мәлімдеді.
– Қазіргі таңда әлемдік экономикада біраз қиындық туындауда. Оның біздің мемлекетімізге де әсері тиюі мүмкін. Соған байланысты Шымкент қаласында дағдарысқа қарсы экономикалық тұрақтылықты қамтамасыз ету жұмыстары жүргізілуде, — деді Ербол Әбілхайырұлы.
Спикердің айтуынша, Шымкентте коронавирус жұқтырған адам тіркелмеген. Бірінші кезекте халықты азық-түлікпен қамту мәселесі тұр. Сауда орындарында баға тұрақты, азық-түлік қоры жеткілікті
Медициналық тұрғыдағы дайындыққа келсек, қалада барлық талаптарға сай келетін 170 орын, 680 провизорлық жатын-орын әзірленген, 750 орынды аурухананы дәрі-дәрмекпен ұстап тұруға мүмкіндік бар. 4300 азамат дайындық жұмыстарына резерв ретінде тұр.
Сонымен қатар, резервте 650 мыңнан аса бетперде бар.
Жалпы, Шымкентте 750 дәріхана бар. «Гаухар» тігін фабрикасы мен №5 колледж күніне 500 мың данаға дейін көп қолданыстағы бетперде тігуге қызу кіріскен. Екі күннен кейін қала дәріханаларында дәке мен бөзден тігілген 4 қабатты маска — 110 теңге, 8 қабатты маска — 130 теңге, 16 қабатты маска 200 теңгеден сатылымға шығады.
Антисептиктердің бағасы 420 теңгеден болуы керек. Әр азаматқа 2 немесе 4 данадан ғана сатылуы тиіс. Егер осы белгіленген бағалардан ауытқушылық байқалса, қала әкімдігінің сайтына шағымдануға болады.
ШЫМКЕНТ ҚАЛАСЫ ӘКІМДІГІНІҢ РЕСМИ САЙТЫ
