Мәжіліс депутаты Елнұр Бейсенбаев «Қазақстан темір жолы» ұлттық компаниясының жұмысын сынға алды, деп хабарлайды «Ұлт ақпарат».
Оның айтуынша, бүгінде теміржол жолаушылар тасымалының сапасы сын көтермейді. Себебі вагондар құрамының көп бөлігі – кеңес заманының мұрасы. Жыл сайын вагондар паркін жаңарту мәселесі көтерілгенімен, жоспар орындалмайды.
«Қазіргі уақытта теміржол құрамының кемінде 60%-ы тозған, пайдалануға жарамайды. Ал министрлік вагондар паркін түбегейлі жаңартуды 2030 жылға жоспарлап отыр. Осы орайда, ескере кететін жайт «Қазақстан темір жолы» ұлттық компаниясы 1997 жылы құрылды. Яғни, 26 жыл күткеніміз аздай, енді тағы да 7 жыл күтуіміз керек. Күткен үмітіміз ақталатынына, вагондар паркін жаңарту жұмысы тиімді болатынына сеніміміз аз. 2030 жылы қалған вагондар ескіріп, теміржол құрамы паркінің тозуы 80 проценттен асып кетпейтініне кім кепіл?! «, — дейді Бейсенбаев Премьер-министрге жолдаған депутаттық сауалында.
Депутаттың айтуынша, жаз айларында пойызға билет табу өте қиын. Оның үстіне теміржол билеттерінің құнын субсидиялауға жыл сайын қомақты қаражат бөлінсе де, баға шарықтап тұрады.
«Кондиционері істемейтін, терезелері ашылмайтын, қабырғасында тарақандар жүретін, қазіргі уақытта тозығы жеткен вагондарға жаз мезгілінде билет сатып алу арман болды. Ал сәті түсіп билет тапқан бақытты жандарды вагон ішінде нағыз масқара күтіп тұрады. Билет тапшылығымен қатар, билеттің қымбатшылығын көріп отырмыз. Олар әртүрлі мобильді қосымшаларда сатып алу кезінде ерекшеленеді», — деп ашынды мәжілісмен.
Бейсенбаев ҚТЖ-ның құрылғанына 26 жыл болса да, бұл саладағы жұмыс әлі күнге дейін реттелмегенін айтты.
«Сол себепті депутаттық сауалда көтерілген мәселелерді жан-жақты зерделеп, теміржол тасымалы мәселесін түбегейлі шешуді сұраймыз. Бұл — жай ғана бір депутаттың сауалы емес, бір өңірден екінші өңірге жаз бойы жете алмаған мыңдаған азаматтың аманаты. Жылына 24 миллиардтан астам тікелей субсидия алатын ұлттық компанияның жұмысын ретке келтіретін уақыт жетті», — деп мәлімдеді депутат.
