Бүгін Шымкенттегі Достық үйінде қалалық Қазақстан халқы Ассамблеясы «Жомарт жан» жобасы аясында «Мектепке жол» акциясын ресми түрде бастады. Бұл акция балалардың білім алуына қолдау көрсетуге және әлеуметтік жағдайы төмен отбасылардың қамқорлығын арттыруға бағытталған маңызды қайырымдылық шара болып табылады.
Қалалық Қазақстан халқы Ассамблеясы мен Ақсақалдар кеңесінің мүшесі, белгілі кәсіпкер А. Халназаровтың тікелей атсалысуымен акция аясында әлеуметтік тұрғыда аз қамтылған және көп балалы отбасыдан шыққан 100 оқушыға 1,5 млн. теңгенің мектепке қажетті оқу құралдарын (сөмке, дәптер, пенал, түрлі-түсті қалам, қаламсаптар және тағы басқа заттар) табыстады. Бұл оқу құралдары балалардың сапалы білім алуына және оқу процесінде қажет заттардың толық болуына зор ықпал етеді.
Игі іс-шараға қалалық ҚХА төрағасының орынбасары Тахирбек Нишанбаев, қалалық ҚХА жанындағы Ақсақалдар кеңесінің мүшесі Арипджан Халназаров және «Қоғамдық келісім» мекемесінің басшысы Нұркен Әлімқұлов қатысып, оқушылардың білім алуына қажетті керек-жарақтарын үлестіріп, ерекше көңіл бөлді. Олар акцияның балалар мен олардың ата-аналарына үлкен демеу екенін айтып, мұндай шаралардың тұрақты түрде өтуін тілеп, қоғамдық қолдаудың маңыздылығын атап өтті.
Аталған акцияны Ассамблея алаңында ұйымдастырған жауаптылардың айтуынша, бұдан бөлек, қалалық ҚХА жанындағы Аналар кеңесі бастауыш сыныптарға баратын 32 бүлдіршінді қажетті оқу құралдарымен қамтамасыз етуді өз жауапкершілігіне алған. Сонымен қатар, қалалық этномәдени бірлестіктердің белсенділері Шымкенттің 13 нүктесінде дәл осы мақсатта қайырымдылық іс-шарасын өткізіп, 6 млн. теңгенің заттарын аз қамтылған, әлеуметтік осал топтар мен көп балалы отбасылардан шыққан балаларға таратуда. Бұл жұмыстар әлеуметтік әділеттілік пен қолдауды қамтамасыз етуге бағытталған, қоғамдағы ынтымақтастық пен қамқорлықты арттырады.
Айта кетейік, Шымкент қалалық ҚХА мүшелерінің қолдауымен «Мектепке жол» акциясы аясында жалпы, 7,9 млн. теңгенің көмегін шымкенттік 532 оқушыға табыстады. Осылайша, акция қаладағы білім алуға деген әлеуметтік қолдаудың кең көлемде жүзеге асырылып жатқандығын көрсетеді және келешек ұрпаққа білім беру ісіндегі маңызды қадам болып табылады.
