«AMANAT» партиясының «Баланы мектепке дайындайық» акциясы аясында Шымкент қаласында 200 балаға мектеп сөмкесі мен оқу құралдары толығымен сыйға берілді. Бұл шара қаламыздағы көпбалалы және әлеуметтік аз қамтылған отбасылардың балаларына ерекше қолдау көрсету мақсатында ұйымдастырылып, олардың білім алуына жағдай жасауға бағытталды.
Игі шараға «AMANAT» партиясы Шымкент қалалық филиалының төрағасы Мұрат Жолдыхожаев, партияның қалалық филиалы атқарушы хатшысының орынбасары Ербол Байқонысов, Қаратау аудандық филиалының төрағасы Бауыржан Кеңесұлы, аудандық филиалдың атқарушы хатшысы Данияр Омаров, сондай-ақ мәслихат депутаттары Талғат Балтабаев пен Айжан Наимбекова қатысты.
Іс-шара барысында Мұрат Жолдыхожаев балаларды жаңа оқу жылының басталуымен құттықтап, сәттілік тіледі.
— «AMANAT» партиясы жыл сайын жаңа оқу жылы қарсаңында осындай акция ұйымдастырып, балаларды қуантуды дәстүрге айналдырған. Биыл да сол үрдісті жалғастырып, ауқымды шара өткізудеміз. Мақсатымыз – балаларға қуаныш сыйлап, жаңа оқу жылын көтеріңкі көңіл-күймен бастауына мүмкіндік беру. Барша бүлдіршіндерге озат оқушы болуды тілеймін, — деді ол.
Акция барысында көпбалалы және әлеуметтік аз қамтылған отбасылардың 200 баласына қажетті оқу құралдарымен толық жабдықталған мектеп сөмкелері табысталды. Әрбір сөмке қажетті оқу құралдарымен қамтылған және баланың оқу процесін жеңілдетуге бағытталған арнайы материалдармен толықтырылған. Бұл шара балалардың білім алудағы тең мүмкіндіктерін қамтамасыз етуге үлкен үлес қосады.
Жиналған ата-аналар демеушілік жасап, қолдау білдірген партия мүшелеріне ризашылығын жеткізді. Олар мұндай қолдаудың балалар мен отбасылар үшін үлкен маңызы бар екенін атап өтіп, осындай игі бастамалардың көптеп ұйымдастырылуын тілейді. Мұндай қайырымды істер алдағы уақытта да жалғасын таппақ. Партия бұл бағыттағы жұмыстарын кеңейтіп, көбірек балаларға көмек көрсетуге ұмтылады, білім саласында жаңа жобалар енгізуге дайын екенін білдірді.
