Денсаулықты сақтау үшін күніне кемінде он мың қадам жүру маңызды екені жиі айтылады. Дегенмен, жаңа ауқымды зерттеу одан да аз жүру пайда әкелетінін көрсетті. Ғалымдар денсаулыққа пайдалы болу үшін күніне төрт мың қадам жеткілікті екенін айтады. Бұл туралы Naked Science басылымындағы зерттеуде жазылған.
Отырықшы өмір салты ең алдымен жүрек-тамыр жүйесі ауруларынан өлім қаупін арттыратыны туралы дәлелдер бар. Осыған қарамастан, әлем халқының кем дегенде төрттен бір бөлігі жеткілікті физикалық белсенділік танытпайды. Дүниежүзілік денсаулық сақтау ұйымының мәліметтері бойынша жыл сайын 3,2 миллионнан астам адам қозғалыстың болмауынан қайтыс болады.
Әдетте қалыпты белсенділікті сақтау үшін күніне он мың қадам, жақсырақ жылдам қарқынмен жүру керек деп есептеледі. Бірақ жақында ғалымдар одае да аз жүру арқылы денсаулығыңызды сақтай алатыныңызды дәлелдеді.
Америкалық және поляк дәрігерлері жүргізген жаңа зерттеу өлім қаупін азайту үшін төрт-бес мың қадам жеткілікті екенін көрсетті. Бұл туралы European Journal of Preventive Cardiology журналында жарияланған мақалада сипатталған.
Мацей Банач, Лодзь медициналық университетінің профессоры және оның әріптестері осы тақырып бойынша алдыңғы 17 ғылыми мақаланың деректерін жинақтайтын мета-талдау жүргізді. Зерттеу екі жыныстағы 227 000-ға жуық адамды қамтыды (орташа жасы 64 жас), олар үшін қадамдар саны мен жүрек-қан тамырлары аурулары мен басқа себептерден өлім қаупі арасындағы байланыс бағаланды. Мұндай зерттеулер себеп-салдарлық байланыстарды айтпайды, тек корреляцияны көрсетеді.
Тәулігіне орташа қадамдар санының 500-ге артуы жүрек-қан тамырлары проблемаларынан болатын өлім қаупін жеті пайызға, ал 1000 қадам кез келген себептерден болатын өлім қаупін 15 пайызға төмендететінін көрсетті. Дегенмен, жаяу жүрудің маңызды артықшылықтары бұрын ойлағаннан әлдеқайда төмен деңгейден басталады.
Барлық себептерден болатын өлім-жітімді төмендету үшін 3967 қадам, ал жүрек-қан тамырлары ауруларының алдын алу үшін 2337 қадам жеткілікті екен.
Сонымен қатар, жаяу жүрудің әсері 60 жастан асқан адамдарда көбірек байқалды. Күніне 7-13 мың қадам жаяу жүру арқылы олар өлім қаупін 49 пайызға төмендете алады.
