Шымкентте «Қытайға қарсылық» танытқан үш белсендіге айыппұл салды

487
Шымкент соты 5 қыркүйек күні қаладағы Кең баба саябағында рұқсат етілмеген акцияға қатысқан жергілікті белсенділер Жарқынбек Сейтінбек, Айжан Жолдасова мен Орал Біләлиевтің әрқайсысына 50500 теңге (шамамен 130 доллар) айыппұл салды. Бұл ақпаратты 23 қыркүйекте Шымкент қалалық мамандандырылған әкімшілік соты растады.
Әкімшілік соттың хабарлауынша, үш белсенді «бейбіт жиналыстар, митингілер, шерулер, пикеттер мен демонстрацияларды ұйымдастыру мен өткізу ережелерін бұзғаны» үшін әкімшілік жауапқа тартылған.
Жарқынбек Сейтінбек пен Орал Біләлиевті 21 қыркүйекте таңертең Ордабасы ауданы Қайнарбұлақ ауылындағы туысының үйінен полицияға алып кетіп, сол күні сағат 16:00-де әкімшілік сот шешім шығарған. Сол күні күндіз Айжан Жолдасованы Шымкенттегі Иляев көшесінде ұстап, сотқа жеткізген. Сот шешімінен кейін Азаттық тілшісі сөйлескен Сейтінбек апелляциялық шағым жазбайтынын айтты.
Жарқынбек Сейтінбек, Айжан Жолдасова мен Орал Біләлиев 5 қыркүйекте Шымкенттегі Кең баба саябағында «Қытай жобаларына» қарсы Жаңаөзен тұрғындарының талабын қолдау акциясына қатысқан. Наразылар елде «Қытай ықпалының күшейгенін» айтып, Қазақстан үкіметінің «қытай инвестициялық жобаларын» іс асыру туралы бірлескен жоспарына наразылық білдірген. Билік өкілдері Қытаймен бірлескен жобалар аясында жаңа жұмысқа орналасқандардың басым бөлігі қазақстандықтар екенін, жұртқа жобалар жайлы «ақпарат дұрыс жетпей жатқанын» мәлімдеген.
2-3 қыркүйекте Маңғыстау облысындағы Жаңаөзен қаласында жергілікті тұрғындар «Қытай жобаларына» қарсылық акциясын өткізді. Кейін Алматы, Нұр-Сұлтан, Ақтөбе, Семей, Шымкент және тағы басқа қалаларда жаңаөзендіктер талабын қолдаған акциялар өтті. Билік ол акциялар кезінде ешкімді ұстаған жоқ. Алайда сол кезде көзге түскен кей белсенділерді өткен аптадан бастап «митингі туралы заң ережесін бұзғаны» үшін жауапқа тарта бастады: кейбіріне айыппұл салып, кейбірін әкімшілік қамауға алды.

Дереккөз:zhasalash.kz