Түркістан облысының әкімі Өмірзақ Шөкеев Төлеби ауданын аралап, нөсер жауыннан зардап шеккен нысандарды ретке келтіру жұмыстарын тексерді. Бұл туралы облыс әкімдігінің баспасөз қызметі хабарлады.
Төлеби ауданында жергілікті ауқымдағы табиғи сипаттағы төтенше жағдай жарияланып, арнайы комиссия жұмыс істеп жатыр. Облыс әкімінің орынбасары М.Мырзалиев төрағалық ететін төтенше жағдай бойынша штаб құрылып, су басқан елді мекендерде тиісті жұмыстарды атқару үшін 4 сектор белгіленген болатын. Әр секторға жауапты болып Қазығұрт, Ордабасы, Сайрам, Төлеби аудандарының әкімдері бекітілген.
Жағдайды ретке келтіру мақсатында бүгінгі таңға 293 адам, 27 мотопомпа, 38 техника жұмылдырылған. Келтірілген залал шығындарын анықтау жұмыстары жүргізілуде.
Қазіргі уақытта селден жапа шеккен 30-дан астам үй анықталып, олар қайта салынатын болады. Сондай-ақ, нөсер жауынның салдарынан Жоғарғы Қасқасу елді мекеніндегі «Қасқасу» өзені бойында орналасқан 4 көпірді су шайып кеткен болатын. Қазіргі таңда жобалық құны 82,8 млн. тг құрайтын 4 көпірдің сметалық құжаттары әзірленген.
Жоғарғы Қасқасу елді мекенінде 44 абонент ауыз судан уақытша ажыратылған болатын. Аудан әкімдігі тарапынан шұғыл қалпына келтіру шаралары қабылданып, аталған абоненттерге ауыз су 15.05.2020 жыл сағат 19.00-ге дейін қосылды.
Барлық атқарылып жатқан жұмыстармен танысқан облыс әкімі штаб жұмысына жоғары баға берді. Су тасқынынан зардап шеккен елді мекендерде электр энергиясы және табиғи газбен қамту жағдайы тұрақты екендігіне көз жеткізді.
Естеріңізге сала кетейік, нөсер жауынның салдарынан Төлеби ауданындағы өзендердің су деңгейі көтеріліп, арық-атыз, қыр-сайлардан жиналып аққан жаңбыр суынан 6 елді мекендегі 250 тұрғын үйлердің ауласына, оның ішінде 76 үйге су кірген болатын.
