Шымкент қаласындағы «Достық» үйінде ҚР Конституциясының 30 жылдығына орай «Әр азаматқа — заңдық көмек!» акциясы ұйымдастырылды. Іс-шара барысында қаладағы белгілі нотариус, заңгерлер мен басқарма өкілдері азаматтарға құқықтық кеңес беріп, олардың заңды құқықтарын қорғауға бағытталған ақпараттармен таныстырды. Бұл іс-шараның басты мақсаты – қоғамның құқықтық сауатын арттыру, азаматтардың құқықтық мәселелерін шешуге көмек көрсету және заңның қағидаттары мен әділеттілікке негізделген шешімдер қабылдауға ықпал ету.
Шымкент қаласы Әділет департаменті ұйымдастырған бұл іс-шараның негізгі мақсаты – халықтың құқықтық сауатын арттыру, азаматтардың даулы мәселелерінің шешілуіне көмек беру, әділет саласында атқарылып жатқан жұмыстармен таныстыру. Мұндай акциялар арқылы қала тұрғындары тек құқықтық кеңестер ала отырып, өздерінің заңды құқығын түсініп, түрлі даулы мәселелерді шешудің тиімді жолдарын үйренді.
Акция аясында кәсіби заңгерлер, адвокаттар қала тұрғындарына отбасылық, еңбек, мүліктік сипаттағы келіспеушіліктер бойынша тегін кеңес беріп, даулы мәселелерді шешудің жолдарын түсіндірді. Бұл, әсіресе, тұрмыстық қиындықтар мен дауларды шешуде маңызды рөл атқарды. Тұрғындар өз құқықтарын қорғау үшін қажетті ақпараттар мен кеңестер алды, олардың сұрақтарына жауап берілді.
Шымкент қаласы Әділет департаментінің басшысы Айнұр Исабекова іс-шараның маңыздылығын атап өтіп, мекемеге азаматтар негізінен, сот орындаушыларға қатысты мәселелермен жүгінетінін айтты. Оның айтуынша, бүгінгі таңда Әділет министрлігі тарапынан цифрлық бағытта жаңа тетіктер іске қосылуда, бұл өз кезегінде азаматтардың құқықтық мәселелерін шешуде процесті жеңілдетуге мүмкіндік береді. Цифрлық жүйелердің енгізілуі азаматтардың уақытын үнемдеуге, заңды рәсімдерді оңтайландыруға, сондай-ақ құқықтық қызмет көрсету сапасын арттыруға ықпал етеді.
Қалада ҚР Конституциясының 30 жылдығына орай белгілі адвокаттар, заңгерлер, Шымкент қалалық ҚХА жанындағы этномедиация кеңесінің мүшелері мен медиаторлар түрлі мекемелерде акциялар, ашық есік күндерін тұрақты өткізіп, азаматтарға құқықтық көмек беріп жатыр. Бұл шаралар қала тұрғындары арасында құқықтық сауаттылықты арттырудың және даулы мәселелерді бейбіт жолмен шешудің маңызды қадамы болды. Аталған іс-шаралар одан әрі жалғасын таппақ, және бұдан былай да тұрғындар өздерінің құқықтық мәселелеріне қатысты көмек ала алатын болады.
