Шымкент қаласы Қоғамдық кеңесінің кезекті отырысы өтті. Жиынды кеңес төрағасы Бұхарбай Рысқұлұлы Парманов жүргізді. Басқосуға кеңес мүшелері, мемлекеттік орган өкілдері мен бұқаралық ақпарат құралдарының журналистері қатысты.
Отырыстың басында қоғамдық кеңес құрамына жаңа мүше қабылданды. Артур Дрейлинг ресми түрде кеңес мүшесі атанды.
Күн тәртібіне сәйкес бірнеше салалық басшылардың есептері тыңдалды. Олардың қатарында Еңбекші ауданының әкімі Д.Есілбек, Қаратау ауданының әкімі А.Абаев, Шымкент қаласының білім саласында сапаны қамтамасыз ету департаментінің басшысы Р.Әліш және кәсіпкерлік пен индустриалды-инновациялық даму басқармасының басшысы Б.Азимбердиев болды.
Аудан әкімдерінің баяндамасында халықпен байланыс, аумақтың тазалығы және аяқ жолдардың жағдайы секілді мәселелер қозғалды. Еңбекші және Қаратау аудандарында тұрғындармен тұрақты қарым-қатынас орнатылғаны айтылды.
Білім саласында сапаны қамтамасыз ету департаментінің жұмысы да назарға ұсынылды. Екі бөлімнен тұратын мекемеде сегіз маман қызмет етеді. Негізгі бағыттары – білім сапасын бағалау, лицензиялау, мемлекеттік бақылау, мониторинг жүргізу, балалардың құқықтарын қорғау және ақпараттық-түсіндіру шаралары. Сондай-ақ консультативтік-кеңесші орган жұмыс істейді. 2025 жылы департамент білім беру саласында заңнамалардың орындалуын бақылауға бағытталған іс-шараларды жүзеге асырған.
Кәсіпкерлік пен индустриалды-инновациялық даму басқармасының мәліметінше, 2025 жылғы 1 шілдедегі жағдай бойынша қалада 798 белсенді кәсіпорын жұмыс істейді. Оның 18-і – ірі, 43-і – орта, 737-сі – шағын бизнес субъектілері. Өңдеу өнеркәсібінде 696 кәсіпорын еңбек етуде. Биылғы қаңтар-шілде айларында Шымкентте 812,6 млрд теңгенің өнімі өндіріліп, көрсеткіш өткен жылмен салыстырғанда 15,8 пайызға артқан.
Жиын барысында кеңес мүшелері баяндамашыларға сұрақтар қойып, ұсыныстарын ортаға салды. Қоғамдық кеңес төрағасы көтерілген мәселелердің барлығы қоғамдық бақылауда болатынын атап өтті.
