Бүгін Шымкент қалалық Қазақстан халқы Ассамблеясы мен «Respublica» партиясының Шымкент қаласындағы әйелдер қанатының облыстық филиалы бірлесе отырып, жаңа оқу жылы қарсаңында «Мектепке жол» акциясын өткізді.
Іс-шара «Достық үйінде» өтті. Балаларды аниматорлар көңілді бағдарлама арқылы қарсы алып, мерекелік көңіл-күй сыйлады. Салтанатты жиынды жүргізуші ашып, қонақтар мен қатысушыларға жүрекжарды тілектерін жеткізді.
Шараға «Respublica» партиясының Шымкент қаласындағы әйелдер қанатының облыстық филиалының төрайымы Нилуфар Сайдуллаева, ҚХА жанындағы қалалық Аналар кеңесінің төрайымы Гүлжан Сүгірбаева, сондай-ақ партия мүшелері мен қоғам белсенділері қатысты.
Акция аясында 70-тен аса оқушыға мектепке қажетті құрал-жабдықтар табысталды. Балалардың қуанышын бөлісуге арнайы шақырылған аниматорлар би мен ойын ұйымдастырып, мерекелік шараны шаттыққа бөледі.
— «Бала қуанса – әлем қуанады. Бүгінгі шара арқылы балаларға қамқорлық пен мейірім сыйлау – бәріміздің ортақ міндетіміз. Бұл – болашақ ұрпаққа жасалған инвестиция», – деді ҚХА жанындағы қалалық Аналар кеңесінің төрайымы Гүлжан Сүгірбаева
Салтанатты жиын соңында балаларға арнап сыйлықтар табысталып, оқу жылына сәттілік тіленді.
Айта кету керек, бұл акция – Қазақстан халқы Ассамблеясы мен «Respublica» партиясының қоғамдағы әлеуметтік жауапкершілігін көрсететін нақты іс-шаралардың бірі. Осындай бастамалар арқылы Ассамблея этносаралық татулықты нығайтып қана қоймай, әлеуметтік қолдау бағытында да белсенді жұмыс атқарып келеді. Ал партиялар мен қоғамдық бірлестіктер халықтың мұң-мұқтажына құлақ асып, нақты мәселелерді шешуге ұмтылуы – азаматтық қоғамның дамуына жол ашады.
Бұндай бірлескен жобалар – ел ішіндегі бірлік пен өзара қолдаудың айқын көрінісі. Қоғамдық ұйымдар мен белсенді азаматтардың бастамалары мемлекет пен халық арасындағы байланысты нығайтып, ел ертеңі үшін жасалып жатқан игі істердің артуына ықпал етеді.
