МАҚСАТ – САНАЛЫ ҰРПАҚ ТӘРБИЕЛЕУ

173

Қоғамдық келісім мен қазақстандықтардың бірлігін нығайту балабақша мен мектеп қабырғасынан басталады. Сондықтан да, мемлекет саналы да отаншыл ұрпақ тәрбиелеуге баса көңіл бөлуде.

Шымкент қаласы әкімінің бірінші орынбасары Шыңғыс Мұқан өңірдің даму стратегиясы аясында әлеуметтік салаларда атқарылған жұмыстар бойынша баспасөз брифингінде «Шымкент қаласының білім саласына 2021 жылға 135 002,1 млн теңге бөлініп, алдыңғы жылмен салыстырғанда бұл көрсеткіш 84,3 %-ға артып отыр», деді.

Қалада 2017-2021 жылдар аралығында мектепке дейінгі білім беру ұйымдарының саны 100-ге артып, 3-6 жас аралығындағы балаларды мектепке дейінгі оқыту және тәрбиелеумен қамту пайызы 5,7 %-ға ұлғайған.

Кәмелетке толмағандардың бос уақытын тиімді пайдалану мақсатында 11 қосымша білім беру мекемесіндегі 20 061 тәрбиеленушіні қосымша біліммен қамту көрсеткіші – 74%. Жалпы 157 882 оқушыны құрайды. Спорт басқармасына қарасты 24 спорт мектепте – 15 341 (7,1%). Білім басқармасына қарасты қосымша білім беру, мектеп жанындағы үйірмелер есебінен – 142 541 (67%). Биыл қосымша 23 робототехника кабинеті, 4 технопарк және бизнес инкубаторлар ашылды.

Қала әкімінің бірінші орынбасарының айтуынша, 2021 жылы 175 мекеме ғимаратына ағымдағы жөндеу жұмыстарын (ақтау, сырлау) жүргізу үшін 330 млн 600 мың теңге қаржы қаралып, 85 %-ның мердігері анықталды. Жөндеу жұмыстары басталуда.

Білім беру мекемелерінің жылыту жүйелерін жөндеу, қысымдау жұмыстарына 74 млн 300 мың теңге  қаралды. Жөндеу жұмыстарын тамыз айына дейін жүргізу жоспарлануда.

Қалада 16 мектеп күрделі жөндеуді қажет етеді. Ағымдағы жылы 1 мектепке (№14 жом) күрделі жөндеу жұмыстарын жүргізу үшін қаржы қаралып, бүгінгі таңда жөндеу жұмыстары жүргізілуде. Сондай-ақ, шаһарда білім беру ұйымдары 100 % бейнебақылау камераларымен қамтылған.

Міне, атқарылып жатқан осы жұмыстардың барлығы да бір мақсат – саналы ұрпақ тәрбиелеу мақсатына бағытталған.