Таиландтағы жойқын жер сілкінісінен кейін туристер турлардан жаппай бас тартып жатыр. Соңғы бірнеше күнде ірі қонақүйлерде бөлме брондаған мыңнан астам турист ақшасын қайтарып алған. Бұл туралы Stan.kz ақпарат агенттігі Reuters баслымына сілтеме жасап хабарлайды.
Сарапшылар енді Таиландқа келушілердің саны уақытша төмендейді деген болжам жасады. Олардың болжамынша, алдағы екі аптада әлемнің түкпір-түкпірінен келетін туристер саны 10-15% азаяды. Өйткені олар жер сілкінісі қайталануынан және жерасты дүмпуі бұрынғыдан да жойқын бола ма деп қорқады.
Сондай-ақ табиғи апаттан Бангкоктағы саяхатшылар арасында танымал сәулет ғимараттары зақымданған. Бұл Таиланд экономикасына қатты әсер етуі мүмкін дейді сарапшылар. Айта кетейік, Таиландта әр бесінші адам туризм саласында жұмыс істейді.
Айта кетейік, Таиландтың Бангкок қаласындағы жерасты дүмпуінен қаза тапқандардың саны 22-ге жетті. Оның 19-ы 30 қабатты ғимарат құлағанда мерт болған. 34 адам зардап шегіп, 11-і ауруханада ем алып жатыр.
Еске салайық, Оңтүстік-Шығыс Азияда екі күшті жер сілкінісі болды. Соның салдарынан Бангкокта салынып жатқан көпқабатты ғимарат құлады. Жерасты дүмпулерінің эпицентрі Мьянмада тіркелді.
Соңғы мәліметтерге сенсек, Мьянмадағы жер сілкінісінен қаза болғандар саны 2,7 мыңнан асты. 4,5 мың адам жарақат алып, 400-ге жуығы із-түссіз жоғалып кетті.
Осыдан соң Тоқаев Мьянма мен Таиланд халқына көңіл айтып, жеделхат жолдады.
