Түркістан облысында жол құрылысында неміс технологиясын қолдану жолдары пысықталды, деп хабарлайды ERNUR.KZ. Түркістан облысы әкімінің бірінші орынбасары Зұлпыхар Жолдасов Германия мемлекетінен келген инвесторлармен кездесті.
Кездесуге «German — GreenTec Ecologic GmbH» компаниясының құрылтайшысы-серіктесі Фридрих Штек, «Anderbold — Сибирь» компаниясының бас директоры Сергей Шнайдер, «Underbold Ltd.» компаниясының бас директоры Талғат Керімов және аталған компанияның өкілдері қатысты. Кездесу барысында облыс әкімінің бірінші орынбасары жаңа бастамаларды қолдауға дайын екенін жеткізді. – Біздің облыста автомобиль жолдарын дамыту, жаңа технологияларды қолдану және олардың сапасын арттыру бойынша кешенді жұмыстар жүргізілуде.
Әкімдік жаңа технологияларды қарастыру бастамасын қолдайды. Осыған байланысты «underbold» тұрақтандырғышын қолдануға және осы технологияның тиімділігімен толығырақ танысуға дайынбыз, – деген Зұлпыхар Жолдасов жауаптыларға пилоттық жоба ретінде аудандардағы проблемалық көшелерге осы технологияны пайдалануды, өзге өңірлердегі аталған компания атқарған жұмыстарды саралауды тапсырды. Underbold Ltd. – Германияның «German-greentec Ecologic GmbH» компаниясының еліміздегі эксклюзивті өкілі.
Компания неміс инновациялық технологиясы арқылы «underbold» эмульсионды стабилизаторын трансферттеу жобасын жүзеге асырып жатыр. Бұл технология әлемнің барлық елдерінде заманауи автомобиль жолдарын салуда 20 жылдан астам уақыт бойы қолданылады.
Инвестор неміс сапасы мен беріктігіне кепіл беретін бұл технологияның экологиялық таза өнім екенін, бюджетті 30%-ға дейін үнемдеуге, жоғары өнімділік пен тиімділікті қамтамасыз етуге мүмкіндік беретінін айтты. Сонымен қатар ауа райындағы өзгерістерге төзімділік деңгейі жоғары екенін (-50, +50) және құрылыс уақытын үнемдейтінін жеткізіп, жол жабынының қызмет мерзіміне 5 жылдық кепілдік беретінін атап өтті. Бүгінгі таңда облыста жолдардың жалпы ұзындығы 17 700 шақырымды құрайды. Биыл өңірде құрылыс және жөндеу жұмыстарымен 202 нысан немесе 1 103,3 шақырым жолдар мен көшелер қамтылмақ.
