Ташкентте Ұлттық Өнер және кәсіподақ қозғалысының мерекесі өтіп, Шымкенттік кәсіподақтар Достық Фестивальіне қатысты.
Ташкент, Өзбекстан – 2025 жылдың шілде айында Өзбекстанда өткен «Достық» фестивалі аймақтық ынтымақтастықтың маңызды кезеңіне айналды. Өзбекстан кәсіподақтары федерациясының 120 жылдығына орай ұйымдастырылған бұл фестивальге қатысқан Шымкент қалалық кәсіподақ орталығы өз өнерімен және мәдениетімен танылды. Құрамында Шымкенттің кәсіподақ қозғалысының жетекші өкілдері мен белгілі өнерпаздары бар делегация фестивальде елдік өнерімізді паш етті.
Фестивальдің негізгі мақсаты – аймақтағы халықтар арасындағы достықты нығайту және әр халықтың мәдениеті мен өнерін көрсету еді. Қазақстандық делегация, оның ішінде Шымкент қалалық кәсіподақ орталығының өкілдері өнер мен мәдениет арқылы халықтар арасындағы ынтымақтастықтың жаңа деңгейін ашты. Бұл фестивальде өзбек халық әндерін орындау мен қазақтың дәстүрлі өнерін таныту басты орын алды.
Шымкенттен барған өнерпаздар арасында Ғабит Шырынбеков, Батырхан Байданов сияқты әншілер мен Бақытжан Аяпбергенов, Дінмұхаммед Сұлтан секілді күйші-өнерпаздар болды. Олар өз өнерлерімен тыңдармандарды тәнті етіп, қазақ мәдениетінің қадір-қасиетін танытты. Әсіресе, Берік Бейсбеков қазақтың қолөнер шеберлігімен таныстырған көрмесі айрықша қызығушылық тудырды. Өзбекстан кәсіподақтары федерациясының төрағасы Рафиқов Қудратилло Бейсбековтің туындыларын жоғары бағалап, қазақтың бай мәдениетіне деген терең құрметін білдірді.
Бұл фестиваль Шымкент қалалық кәсіподақ орталығының халықаралық аренада алатын орны мен беделін тағы да дәлелдеді. Мұндай мәдени шаралар аймақтық ынтымақтастықтың маңызды бөлігі болып табылады және еңбекшілердің мәдениетін, өнерін және достық қарым-қатынасын нығайтуға ықпал етеді.
