«AMANAT» партиясы Шымкент қалалық филиалы жанындағы Партиялық бақылау комиссиясының кезекті отырысы өтті. Жиынға қалалық партия филиалы атқарушы хатшысының орынбасары Ербол Байқонысов, комиссия төрағасы Ғани Ташқараев, сондай-ақ бірқатар қалалық басқармалардың басшылары мен өкілдері, комиссия мүшелері қатысты.
Кездесу барысында партияның сайлауалды бағдарламасының жүзеге асырылу барысы жан-жақты талқыланып, атап айтқанда Жол картасындағы орындалуы кешігіп немесе орындалмай қалған нысандарға назар аударылды. Комиссия мүшелері қаладағы инфрақұрылымдық жобалар мен білім беру саласындағы маңызды құрылыс нысандарының, атап айтқанда мектеп құрылыстарының жай-күйін егжей-тегжейлі қарады.
Талқылау барысында Энергетика және инфрақұрылымды дамыту басқармасы, сондай-ақ Құрылыс басқармасының басшыларының орынбасарлары комиссия мүшелерінің сұрақтарына нақты жауап беріп, кездескен қиындықтар мен кешігулер себептерін түсіндірді. Сонымен бірге, мектеп құрылыстарын жүргізіп жатқан мердігер мекемелердің мамандары да өз тарапынан түсініктеме беріп, атқарылып жатқан жұмыстардың барысы туралы баяндама жасады.
Жиын соңында Партиялық бақылау комиссиясының мүшелері басқарма өкілдеріне бүгінге дейін орын алған кемшіліктерді жедел түрде жоюды және барлық олқылықтардың орнын толтыруды міндеттеді. Сонымен қатар, алдағы кезеңде әрбір нысан жеке-жеке қаралып, арнайы мониторингтік және бақылау жиындары өткізілетінін жеткізді. Егер де басқармалар тарапынан кемшіліктер мен кешігулер орнында түзетілмесе, заң аясында жауапкершілік шаралары қабылданатыны қатаң ескертілді.
Бұл отырыс «AMANAT» партиясының сайлау алдындағы уәделерін орындау және қаладағы әлеуметтік маңызды жобалардың сапалы әрі уақтылы жүзеге асуын қамтамасыз етуге бағытталған нақты қадамдарының бірі болып табылады. Партияның бақылау комиссиясы қоғамдық сенім мен қала тұрғындарының талаптарын ескере отырып, құрылыс және инфрақұрылым салаларындағы кемшіліктерді ашық түрде талдап, шешімін табуға тырысады.
Осыған орай, партия әрі қарай да бақылауды күшейтіп, әкімдікпен және басқа да жауапты құрылымдармен бірлесе отырып, қала инфрақұрылымының дамуын сапалы қамтамасыз етуге барынша атсалысады.
