Шымкент қаласындағы Кәсіподақтар орталығында ҚР Мәдениет, спорт және ақпарат қызметкерлері салалық кәсіподағының Шымкент қалалық филиалының төрағасы Руслан Байғаниұлы Шерімовтің бастамасымен мәдениет саласының үздік өкілдерін марапаттау рәсімі өтті.
Бұл іс-шара – Кәсіподақтар күні қарсаңында өткізіліп, қаладағы театр, мәдениет орталықтары мен шығармашылық ұйымдарда еңбек етіп жүрген мамандардың еңбегін бағалауға арналды.
Сахна өнерін дамытуға, ұлттық салт-дәстүрді насихаттауға, жас ұрпақтың рухани тәрбиесіне үлес қосып жүрген мәдениет қызметкерлері кәсіподақ тарапынан жоғары құрметке ие болды.
“Мәдениет саласының үздігі”медалі табысталғандар:
- Қошақов Жақсылық Сырлыбайұлы – Шымкент қалалық орыс драма театры директорының орынбасары
- Жанасбаева Эльмира Мейрамқызы – Шымкент қалалық әзіл-ысқақ және сатира театры директорының орынбасары
- Алтыбаева Райхан Сапарқызы – «Әдет-ғұрып және салт-дәстүр орталығының» қызметкері
- Турдалиев Ерғали Шерімбекұлы – Шымкент қалалық қуыршақтар театрының қызметкері
Сонымен қатар, мәдениет саласының өркендеуіне қосқан еңбегі үшін Қарымсаков Исағали Молдазимұлы мен Кеңпейілова Айнұр Нұрлыбекқызы Алғыс хатпен марапатталды.
Барлығы 6 мәдениет қызметкері өз еңбегі мен шығармашылық табыстары үшін марапатқа ие болды.
Іс-шара барысында Руслан Байғаниұлы марапат иегерлерін құттықтап, мәдениет саласының қоғамдағы орны ерекше екенін атап өтті. Оның айтуынша, мәдениет – халықтың рухани тірегі, ал мәдениет қызметкерлерінің еңбегі – жас ұрпақтың бойына ұлттық құндылықтарды сіңіруде баға жетпес қазына.
Кәсіподақ ұйымы алдағы уақытта да мәдениет саласының қызметкерлерін қолдап, олардың әлеуметтік және еңбек құқықтарын қорғауды басты назарда ұстайтынын жеткізді.
