Соңғы рет кірген уақытты жасыру, профиль суретінің басқа қолдаушыларға көрінуін шектеу және бейтаныс нөмірлерден келетін қоңырауларды өшіру функциялары. Енді мұның бәрі бір бөлімде болады. WhatsApp-та құпиялылықты кезең-кезеңімен баптау функциясы пайда болды, деп хабарлайды Tengri Life
WhatsApp мессенджері жаңа Privacy Checkup — «құпиялылықты тексеру» функциясын іске қосты. Ол пайдаланушыларға аккаунт пен жеке деректердің қорғанысын бірнеше қадаммен реттеуге көмектеседі. Бұл туралы сервистің ресми ақпараттық таратылымында мәлімделді.
Енді негізгі құпиялылық баптаулары — соңғы рет кірген уақыттан бастап спам-қоңыраулардан қорғануға дейін — бір жерге жинақталған.
Не өзгерді?
Жаңа функция жеке ақпаратыңызды кімдер көре алатынын және сізге кімдер хабарласуға құқылы екенін жылдам тексеруге мүмкіндік береді.
«Құпиялылықты тексеру» бөлімі арқылы мыналарды баптауға болады:
- соңғы рет кірген уақыттың және «желідегі» мәртебесінің көрінуі;
- профиль фотосы;
- «Өзім туралы» бөлімі;
- мәртебе (статус);
- топтарға шақырулар;
- бейтаныс нөмірлерден келетін қоңыраулар.
Сонымен қатар Silence Unknown Callers функциясы қолжетімді — ол бейтаныс контактілерден келетін қоңырауларды автоматты түрде өшіреді.
Мұндай қоңыраулар телефонда дыбысталмайды, бірақ маңызды болуы мүмкін деген жағдай үшін қоңыраулар тізімінде сақталады.
Функцияны қалай қосуға болады?
Барлық баптауларды бір бөлімнен қарап, өзгертуге болады. Ол үшін:
- «Баптауларға» өту;
- «Құпиялылық» түймесін басу;
- «Құпиялылықты тексеру» тармағын таңдау қажет.
Осыдан кейін алдыңызда 4 тармақ ашылады, онда сізге кімдер хабарласа алатынын таңдауға, жеке деректерді бақылауды реттеуге, сондай-ақ чаттар мен аккаунтты қосымша қорғауға болады.
Функция Қазақстандағы WhatsApp пайдаланушылары үшін қолжетімді болып үлгерді.
Егер бұл бөлім әлі пайда болмаса, App Store немесе Google Play дүкендерінен қолданбаның жаңартуларын тексерген жөн.
WhatsApp деректеріне сүйенсек, жаңарту кезең-кезеңімен енгізіліп жатыр, сондықтан пайдаланушыларға әртүрлі уақытта жетуі мүмкін.
Скриншот: WhatsApp
