Өмірзақ Шөкеев: Мен ешкімге қолдан келмейтін тапсырма жүктемеймін

896
Түркістан облысының әкімі Өмірзақ Шөкеев көмекке зәру отбасыларға мемлекет тарапынан берілетін жәрдемнен басқа да қолдау көрсетудің тиімді тетіктерін жетілдіру туралы айтты, деп хабарлайды ҚазАқпарат тілшісі.
Бұл мәселелер облыс басшысы Өмірзақ Шөкеевтің төрағалығымен өткен мәжілісте қаралды. Әкімдердің ел алдында есеп беру тәртібінің өзгергенін еске салған аймақ басшысы, алда өтетін мұндай жиындарға ескертпей келетінін ескертті.
«Халықтың шын пейілінен шыққан алғыстан асқан баға жоқ. Осыны ұмытпаңыздар. Әр істі барынша беріліп істегенде ғана нәтижеге жетуге болады. Көзбояушылыққа жол жоқ. Мен ешкімге қолдан келмейтін тапсырма жүктемеймін. Өткен жылдың қорытындысы бойынша, барлық салада ауыз толтырып айтар жетістіктер бар. Бірақ мұнымен тоқтауға болмас. Алдымызда мұнан да зор, мұнан да көп міндеттер тұр»,- деді Өмірзақ Шөкеев.
Мәжілісте Түркістан мен Кентау қалаларын дамытуға басымдылық берілетіні және әлеуметтік сала – басты назарда болатыны айтылды. Сала басшыларының сөзінше, халықты ауыз сумен, газбен, жарық пен сапалы жылумен қамтамасыз ету әрі қарай жалғасын таппақ. Тас жолдардың төселуі, жөнделуі, көшелерді жарықтандыру мен көгалдандыру, абаттандыру, суландыру жұмыстары — облыс басшысының қатаң бақылуында.
Жиында Түркістан шаһарын жасыл желекке бөлеу бойынша жоспарланған ағаш отырғызу жұмыстарын наурыз айында толық бітіру жүктелді. Бүгінде қалада салынып жатқан көпқабатты тұрғын үйлердің құрылысы қарқынды. Алдағы уақытта олардың қатары көбеймек. Облыс әкімі жаңа баспаналардың қолжетімді болуын, үйлі болуға ұмтылған азаматтарға жан – жақты мүмкіндік қарастыруды, сондай-ақ баспана беруде барлық сала өкілдерін толық қамтуды міндеттеді.
Жиында Түркістан қаласындағы әуежай мен онда барар жолдың құрылысына қатысты соңғы мәліметтер айтылды. 100-ден астам техника мен 300-ден астам жұмысшы жұмылдырылған құрылыс алаңында жұмыс қызуда. Халықаралық әуежай жыл соңында қолданысқа беріледі.
Түркістаннан 16 шақырым қашықтықта орналасқан 900 гектар жерге әуежай салуды түріктердің «Yda Insaat group» компаниясы мойнына алды. Жаңа нысан халықаралық стандартқа сай және заманауи құрылыс технологиясымен салынып жатыр. Терминал жылына 3 млн жолаушыға қызмет көрсете алады.