Игі шара барысында 60 адамға жалпы сомасы жарты миллионға жуық — 495 000 теңгені құрайтын материалдық көмек табысталды. Бұл қаражатқа оқу құралдары, киім-кешек және басқа да қажетті заттар алынды. Қауымдастық өкілдерінің айтуынша, бұл бастаманың басты мақсаты – балалардың жаңа оқу жылына толыққанды дайындалуына жан-жақты қолдау көрсету, сондай-ақ қоғамда мейірімділік пен жанашырлықты дәріптеу болып табылады.
Сонымен бірге, Шымкент қалалық «Ұйғырлар қауымдастығы» қоғамдық бірлестігі де «Мектепке жол» акциясына белсенді атсалысып, 15 оқушыға 340 мың теңгеге мектепке қажетті оқу құралдары мен спорттық киімдер табыстады. Бұл шаралар әлеуметтік осал топтағы балалардың білім алуына жағдай жасауға бағытталған маңызды қадамдар ретінде жоғары бағаланды. Олар балалардың жан-жақты дамуына, денсаулығын нығайтуға және мектеп өміріне толыққанды бейімделуіне мүмкіндік береді.
Қайырымдылық шарасы жаңа оқу жылы қарсаңында оқушыларға қуаныш сыйлап қана қоймай, олардың білімге деген ынтасын арттыруға үлкен ықпал етті. Осылайша, әрбір бала мектепке өзіне қажетті құрал-жабдықпен барып, оқуына ынталандырылды. Қауымдастық өкілдері осындай игі істерді алдағы уақытта да жалғастыруды жоспарлап отырғандарын жеткізіп, өзара қолдау мен бірлік арқылы қоғамның дамуына өз үлестерін қосуға дайын екендіктерін айтты.
Бұл бастамалар жергілікті билік пен қоғамдық ұйымдардың бірлесе отырып, білім саласындағы мәселелерді шешуге бағытталған тиімді іс-әрекеттерінің жарқын мысалы болып отыр. Осы игі істердің нәтижесінде әлеуметтік осал топтағы балалардың білім алу мүмкіндіктері кеңейіп, олардың болашағына сенімділікпен қарауға жағдай жасалуда.
