Шымкент қаласында «AMANAT» партиясы жанындағы Әйелдер қанатының кезекті отырысы өтті. Іс-шараға Әл-Фараби аудандық партия филиалының төрағасы, Әйелдер қанатының төрайымы Наргиза Керімбаева, атқарушы хатшысы Ердәулет Жүнісбек, сондай-ақ Әйелдер қанатының басқа мүшелері қатысты. Бұл отырыс партияның әйелдер қауымымен жұмысының бағыттары мен болашақ жоспарларын талқылау үшін ұйымдастырылды.
Жиын барысында Әйелдер қанатының өткен кезеңдегі жұмыстары қорытындыланып, алдағы уақытта атқарылатын міндеттер мен мақсаттар белгіленді. Сонымен қатар, Наргиза Керімбаева жаңадан қабылданған мүшелерді таныстырып, олардың белсенді қызметін маңызды деп бағалап, сәттілік тіледі.
Отырыс барысында әйелдер қауымы бірқатар тұрғындарды жеке мәселелерімен қабылдады. Азаматтар негізінен инфрақұрылым мен әлеуметтік мәселелерге қатысты өтініштерін білдірді. Мысалы, Жібек жолы көшесінің тұрғыны көпқабатты үйдің ескірген жылу құбырларын ауыстыруды және ауладағы қураған ағаштарды кесуді сұрады. Бұл ұсыныс хаттамаға енгізіліп, жергілікті әкімдікпен бірге шешу жолдары қарастырылатын болды.
Сондай-ақ, Бауыржан Момышұлы көшесінің тұрғыны көпқабатты үйдің сыртқы қасбетін жаңартуға көмек сұрады. Бұл мәселе де назарға алынып, тиісті шаралар қабылданатыны айтылды.
Қабылдауға келген тағы бір тұрғын ұлының емделуіне қомақты қаржы қажет екенін айтып, көмек сұрады. Тұрғынның мәселесі бойынша медициналық көмектің қажеттілігі мен қаржылық мәселелерді шешу жолдары қарастырылды, сондай-ақ осы бағытта қолдау көрсету үшін партия тарапынан қажетті шаралар қабылданатындығы мәлімделді.
Отырыс барысында айтылған мәселелер мен ұсыныстар партияның әйелдер қанатының жұмысына жаңа серпін беріп, қоғамдық мәселелерді шешу үшін бірге күш салу қажеттігі ерекше атап өтілді. Әлеуметтік қолдау көрсету, әйелдердің құқықтарын қорғау, сондай-ақ олардың қоғамдағы рөлін арттыру мақсатында Әйелдер қанаты мүшелері әрдайым халықтың жанына жақын болып, өз қызметін жетілдіруге бағытталған жұмыстарды атқарып келеді.
Әйелдер қанатының жұмысы тек әлеуметтік мәселелермен шектелмейді, сонымен қатар әйелдердің қоғамдағы рөлін арттыру, оларды әлеуметтік қолдау мен қорғау бағытында да үлкен жұмыстар атқарылып келеді. Жаңадан қабылданған мүшелермен жұмысты күшейту, оларды ұйымның барлық деңгейінде белсенді болуға ынталандыру мәселесі де осы жиынның маңызды тақырыбы болды.
