Сарыағаш ауданында 13 нысан ел игілігіне берілді

957
Түркістан облысына қарасты Сарыағаш ауданында бір күнде 13 нысан іске қосылды. Жаңадан ашылған нысандардың ашылу рәсіміне Сарыағаш  ауданының әкімі Қайрат Аманкелдіұлы қатысып, аудан тұрғындарын айтулы қуанышпен құттықтады, деп хабарлайды ҚазАқпарат тілшісі.
Аудан басшысы алдымен Жібек жолы ауылдық округіне қарасты Жаңақұрылыс елді мекенінде орналасқан 125 орындық «Айша апа» балабақшасының салтанатты ашылу рәсіміне қатысты. Балабақша құрылысы 2018 жылы басталып, 2019 жылдың қаңтар айында тапсырылып отыр. Нысанға тартылған жеке инвестиция көлемі 160 млн теңгені құрайды.  Бөбекжайда 23 адам тұрақты жұмыспен қамтылып, орташа 45 мың теңге жалақы алады.
Бұл күні сондай-ақ, Қапланбек оқу шаруашылығында «Ер есімі — ел есінде» атты аллея салтанатты түрде ашылды.  Аталған аллея «Рухани жаңғыру» бағдарламасы аясында қайта қалпына келтіріліп отыр. Шара барысында екінші дүниежүзілік соғысы жылдары ерлік көрсеткен жауынгерлердің рухына құран бағышталды. Осындай игілікті іс аталған аллеяның жанынан 900 орынға арналған №4 Юрий Гагарин атындағы мектептің ашылуымен жалғасын тапты.  2017 жылдың қараша айында басталған құрылыс 2018 жылдың желтоқсан айында аяқталған. Бұдан өзге, ауданда жергілікті бюджеттің қаражаты есебінен медициналық тірек пайдалануға берілді.
Сондай-ақ, аймақта үш ауысымды мектептің саны қысқарып, Тегісшіл ауылдық округіндегі №49 М.Жұмабаев атындағы мектеп жөндеуден өтті. Сонымен қатар, Майдабозай, Бекбота, Ащыкөл, Қалғансыр, Көпқұдық, Байғабыл елді мекендерінде 10/0,4 кВ электр желілерінің құрылысы аяқталған нысандар іске қосылды. Жоба бойынша 6 елді мекендегі 613 тұрғын үй сапалы электр қуатымен қамтамасыз етіледі.