Басты Қазақстан Кәсіпкер Ахметбек Нұрсила: Баспанасы жоқ қазақтарды адам деп есептемеймін
«Бизнес бастау» шеберлік мектебінің жетекшісі Ахметбек Нұрсила баспанасыз жүрген қазақтарды адам санатына жатқызбаймын деген ойын айтты. Адам мемлекеттің көмегімен емес, өз күшімен баспаналы болуы керек.
Бұл туралы «Не істейміз» бағдарламасында айтылды.
Халыққа бизнестің қыр-сырын үйретіп, сол арқылы ақша тауып жүрген кәсіпкер әр кезде әр түрлі тақырыпта сөз қозғайды. Ауыр сөз айтып, сол арқылы мотивиция бермек болады. Бұны дұрыс қабылдайтындар да, ерсі көретіндер де бар.
Ахметбек Нұрсила әр қазақта баспана, көлік, ақша болуы керек деп есептейді. Сол үшін еңбек ету керек. Жалқаулыққа салынған қазақ мемлекеттен көмек күтеді. Тіпті суыр секілді еңбек етпейді деді.
«Әр қазақ қайда тұрамын, не істеймін, ақшаны қайдан табамын деп уайымдамауы керек. Осыған жетемін деп талпыну керек. Осындай өмір барына сену керек. Еңбек етсең, бәріне жетесің», — деді кәсіпкер.
«Мен суырлы мекен Тарбағатай өңіріненмін. Суырлардың әрқайсысында ін бар. Олар бір-бірінің ініне барып жатпайды. Інді өзі салады, бала-шағасымен сонда өмір сүреді. Ал, кей адамдар суырдың деңгейінен де төмен. Мемлекеттен үй сұрауға арланбайды. Мен оларды суырдың деңгейінен де төмен деп айтар едім. Қазақ жалқау. Алға ұмтылғанға ерінеді. Бәрін қиын көреді», — деді ол.
Соңғы кездері кәсіпкер отандық әншілерді шегірткелерге теңеп, қызу талқыға түскен еді. Көпшіліктің бір бөлігі оны қолдаса, бірі қарсы шықты. Осыдан кейін «Шегіртке» сөзі сәнді терминге айналды.
