Түркістанда шенеуніктер 7 минуттық Қазақстан тарихы туралы бейнероликті 100 миллион теңгеге дайындау жөнінде келісімшарт жасаған. Облыс әкімі осыған байланысты тексеріс жасауды тапсырды. Бұл туралы Stan.kz ақпарат агенттігі хабарлайды.
Әлеуметтік желілерде «Ұлы Дала Елі» орталығы ШЖҚ МКК мен «G7 Exclusive» ЖШС арасында ұзақтығы жеті минут болатын тарихи бейнероликті жасауға келісімшарт жасалғаны туралы пост резонанс тудырған.
Мәдениет басқармасында бұл «Ұлы Дала Елі» орталығы үшін ақпараттық жүйелерді модерациялау және контентпен толықтыру қызметтерін сатып алу туралы екенін түсіндірді. Видеоролик Қазақстан тарихын ежелгі кезеңнен қазіргі уақытқа дейінгі кезеңді әртүрлі көркемдік формалар арқылы – петроглифтер, «аң стилі», шығыс миниатюралары, ұлттық ою-өрнектер, кескіндеме, графика және басқа өнер бағыттары арқылы көрсетуге тиіс.
Бейнематериал арнайы голографиялық шоу залда көрсетілуі жоспарланған. Роликтің ұзақтығы – жеті минутқа дейін.
Түркістан облысының мемлекеттік сатып алу басқармасында жоба үш рет ашық конкурсқа қойылған. Бірақ әр жолы конкурс өтпеген болып танылғаны нақтыланды. Сәтсіз талпыныстардан кейін «Мемлекеттік сатып алу туралы» ҚР Заңының 16-бабы 3-тармағы негізінде бір көзден келісімшарт жасау туралы шешім қабылданған.
28 қарашада жасалған келісімшарттың құны ҚҚС-мен бірге 100 800 000 теңге болды. Орындау мерзімі – 2025 жылдың соңына дейін.
Түркістан облысының әкімдігі осыған орай тексеріс жүргізуді тапсырғанын мәлімдеді.
«Облыс әкімі Нұралхан Көшеров қажет рәсімдердің сақталуын және бюджет қаражатының мақсатты жұмсалуын қоса алғанда, аталған келісімшарттың жасалу жағдайларын жан-жақты тексеруді тапсырды», – делінген хабарламада.
